السبت، 24 نوفمبر، 2012

وشـلون يحـيى الحـب بعــد إهـمـال أو تقـصـير ..


(( محـتاج لوصـالك ))

أنا محــتاج لـوصـــالك كــلام(ن) مايبي تفـســـير
تعـبت اطلبك وإنت اللي على بابك حرس وجـنود
تبي تحـرق لي أعـصــابي ولا ودك عـليك اغـــير
أنـا من قـلـبي أحـــبـك ووافـي لك بكـل عــهــــود
أنـا من قــلة وصــالك مني قـــادر عـلى التـفـكــير
ازعـّـل كـل من حـــولي ومـتأمــل عـلي تجـــــود
وآخــرهـا عـلي تزعــل ولا ترضـى بـأي تبـــرير
وأنا اللي كنت اظـن إني بذلت لخـاطـرك مجـهــود
مــعاك الحـق أنا الغـلـطان ليـه اسـأل عـليك كــثير
من المـفـروض أنا اتجــاهـل ولا كنك أبد موجــود
لازم اخـــفـي شــــعــوري وارفـــع راية التغـــيـير
واسـاير كل طـبع(ن) بك إلى ابعــد مـدى وحــدود
ابي منك أنا اتعــلم اصـــول الحـب وكـيف يـصــير
تعبت ازرع لك ورود(ن) ومن صدك تموت ورود
ألا وشـلون يحـيى الحـب بعــد إهـمـال أو تقـصـير
ألا وشـلون باشـعـل بك فتيل الشــوق وإنت بـرود
عـلـمـني العــطا وشــلون يبـقى مـع عــدم تقــدير
عـلـمـني اكـون انسـان حـاضـر في زمـان شـرود
ابي امـنع احـــاســيـسي مـن الكلـمــة أو التعــبير
واخلي الحب في قلبي على جـدار الوهـم مـسـنود
كــفايه مـن مـشــاعــر ود عـليك تبـعــثرت تبــذير
بكـف القــلب عـن ودك وانطـــر للغــــلا مـــردود

شــعـر
نواف بن يوســف الســعـداني
يوم الأربعــــاء   22/12/1433هـ  ///  07/11/2012م

الخميس، 22 نوفمبر، 2012

من وجــد(ن) إلى وجــدان ...


(( وجـــدان ))

تمــنيت المـشـــاعـر طـــير يلــف الأرض بأكـمـــلها
يوصـل لك رســايل حـب من وجــد(ن) إلى وجــدان
باصـور لك ليالي الشـوق وكيف اتعـب وأنا اسهرها
اساس(ن) ما بقى ليل(ن) وأنا صدري ضـوى ولهان
ليالي الشـوق في صـدري لها شـمـوس(ن) تنـورها
تحــيي الطـــيف لا ســــلم وتفــــتح له بعــد بيــــبان
ولا يهـمـني مـسـافـات(ن) بتبـعـــدني وأنـا اقـهـرها
ما دام احـسـاسي لك طاير بلا ريش(ن) ولا جـنحـان
حـــان الوقـــت يا عــمـــري مـنى الاحـلام احــقـقـها
مـعـاك انتي دعـــاني الوقـــت ارفـــع هــامة البنــيان
اببني لك قـصـور أحـلام مضى عـمري وأنا ارسـمها
تعبت ارسم فرح عمري على الهامش واعيش احزان
تعــــبت أجــــامــل أيـامـي وعــــيت لا تجـــــمــــلهـا
وروحـي تعـــبت تهـاجــر من أوطـان(ن) إلى أوطـان
وجـــاتك روحـي الهـلـكا تبـي حـــضـن(ن) يلـمـلمـها
أنـا بارتـاح لـو بـالـبــال تســــكـني دفــا الاحــــضـان
كــــفايه مــنك يـوصـــلـنـي شـــذى كـلـمــات تنثرهـا
اثـير(ن) في وســط حـــزني يخــليني مـعـك فـرحـان
وهـــذا اللـي أنـا احــــتاجـه مـن الدنيــا وعــــاثـرهـا
إلى من قـلّت حــظــوظـي لـقــيت إني مـعـك إنســـان

شــعـر
نواف بن يوســف الســعـداني
يوم الأربعــــاء  13/09/1433هـ  ///  01/08/2012م

الاثنين، 19 نوفمبر، 2012

ســــنين وافـي للـوعـــد ...


((  وافـي للوعــد  ))

ســــنين وافـي للـوعـــد  ...  اجـــي ولا ألــقـى احـــد
واليوم وش صـاير معك  ...  صحى ضميرك وش بعد
وقـفـــت قـــدامـي هـــنا  ...  وأنـا أنـا كــــلي عــــــنا
بمصـافحك ترجـف يدي  ...  حـتى نســــيت إنـي أنـا

احـساس قلبك ما عرف  ...  حـبك بقـلبي ما اخـتلف
بنيـان واقـف صامد(ن)  ...  مـــرت ســنين ولا تلف
جـدران ما يوم صدعـت  ...  عــيني أنـا بس دمـعـت
لمـا غــلب روحـي ألــم  ...  تنهـيدة بالصدر وجعـت

دمــعة محــــاجر باقـيه  ...  طـول الســنين مجــافيه
صــدقت ظـني في وهـم  ...  مـوتة عـــيوني البـاكيه
يــوم الوداع تحـجـــرت  ...  من يوم جـــيت تذكـرت
آلامــهـا لحــــظـة وداع  ...  وتوهــا اللـي تحــــدرت

سـنين مرت في سـكوت  ...  ما ينسمع للحزن صوت
جـاملت أنا طـول العـمـر  ...  واللحظه أحياها وأموت
بـس الألــــم كـل الألــــم  ...  لمـا أنت ما تحس بنــدم
وتقـــول للعــــالم بعــــد  ...  إني أنا عــــايش وهــــم

شــــعـر
نواف بن يوســف الســعـداني
يـوم الأحــــد    04/01/1434هـ  ///  18/11/2012م

الأربعاء، 17 أكتوبر، 2012

قـلـبي غـلــط يـومــه حــــلم ...


(( غـلــطة القــلب ))

يا اللـي مـســـكـتي هالقـــلم
وكـتبتي حــروفـك  جــروح
بـين الحــــروف اقــــرا ألـم
هــم(ن) بصــدري ما يروح
وش فـــايدة شــــعــر النـدم
والصــوت يبـكي لك يـنـوح
ما لي جـدى بحـب(ن) عـدم
دام الزمـن طــبعـه شـحـوح
قـلـبي غـلــط يـومــه حــــلم
وصـرّح بحـــلـمه بوضــوح
في حب شخـص(ن) ما علم
ولانـي له أبـد(ن) طــمــوح
بنيت صــرحٍ(ن) مـن وهــم
والصــد هـــدّم هالصـــروح
يا ليـت قـلـبـي مـا انغـــــرم
ليته وعى لعـقل(ن) نصوح
يا لـيته احـــســاسـه انكــتم
ولا تجــــــرا إنـه يـبـــــوح
مـا كان عــشـــــنا هـالألــم
ولا ابتـلـــينا بـالجــــــروح

شــــعــر
نواف بن يوسـف الســعـداني
1414هـ  ///  1994م

الأحد، 12 أغسطس، 2012

من الرحـمة إلى القـسـوة تغـير ليه عـنوانك ..



(( إثبــات حـبي ))

إذا تتســلى بأعـصــابي وفي دمـعـي تبي ترتـاح
خـلاص ارتـاح ابي ابكـي وأذل نفـسـي علشـانك
إذا إثبـات حـبي لك تشــوف جـراح فـوق جـراح
أنـا مجـــروح وانـزف لك رجـــا قـــدام بيـبـــانك
تبي تسمعها مني .. إيه خفوقي في غرامك طاح
وطـيب ليه أنا اكـذب .. نعــم محـتاج لأحـضـانك
ابي اغــفا على صـدرك جـعـل هـمي معك ينـزاح
ابتنفـس شذى عطـرك واضـم احـساس وجـدانك
تبي تقـنعـني ما تدري وهـذا الشـوق بي فـضاح
تبـي بالذل أنـا اعـلنها .. نعـم محـتاج لاحـسـانك
حـنانك واهـتمـامـك بي غــريبة ليـه فجـــأة راح
من الرحـمـة إلى القـســوة تغـــير ليـه عــنوانك
أنا الغـلطــان صــدقـتك واعـطــيتك بعــد مـفـتاح
عرفت إنت نقـط ضـعـفي وهـنت انسان ما هانك
لعــنة الحــاجة اللي منك زادتنـي طــعـون رماح
مـا دام إنك تســاومـني وتـرخــصـني بمـــيزانك

شــعـر
نواف بن يوســف الســعـداني
يوم الخمـــيس   21/09/1433هـ  ///  09/08/2012م

 

غــدرت بـي مـا لك أمــان ..


(( مــا لك أمــان ))

جــابتني الذكـرى لمـكان      ...   فـيه اجـتمــعـنا من زمـان
لكـن حـســافه يا بحـــــر  ...  غــدرت بـي مـا لك أمــان

يا اللي تحـسـب العاطـفه  ...  عــندي مجـــــرد ســـالفه
شي انكتب فـوق الرمـال  ...  يمـحـيه مـوج وعـاصــفه

من يامـنك وأنت الغـــدر  ...  مـــلـيـت وأنـا انتـظــــــــر
خـــلاص قـلـبـي اكــتفـى      ...    ما عـاد ابي اسـمـع عــذر

خـــلاص مـاني محــتري  ...  شخص(ن) يعذب خاطري
شـفـني تلثمـت ومشــيت  ...  اقفيت ومعـطـيك اظـهـري

شــــعـر
نواف بن يوســف الســعـداني
يوم الأحـــد     17/09/1433هـ  ///  05/08/2012م

الاثنين، 9 يوليو، 2012

مــا ابـي افـقـــــدك لـو حـتى خـــيال




(( فــاقـد حــنان ))

مكسور قلبي ولاني داري ويش اقول
اهـديتني حـــب(ن) واهـلكته اغــتيال
كـنت في لحـظـات غـفـلات الفـضــول
ادخـل مـتاهـات التـجــارب بـاحـــتيال
احــب هـــذي وذيـك ويمـكن كـل ذول
ألعب على الحـبلين ولا اعـقدها حبال
كـنت اوزع قـلـبي بـين أربع فـصــول
حـتى آخـــر عــامي اطــلع باكتـمـــال
كـنت لاهـي مهـمـل حـسـاب الأصـول
حـتى صـار القـلب عــايش باخـــتلال
مـا صـحــيت إلا على عـمــر الذبــول
يوم صدرك ضاق صـبر(ن) واحتمال
يوم عـشت الوحده واحساس الذهول
فـــاقـد(ن) كـنز المـشـــاعـر والـدلال
فـاقد حـنان وعايش(ن) حالة خمـول
اسمي وحـيد وحالي اصـعب منه حال
لكن على رغــم اخـــتلافات العــقـول
يبــقـى لــنا مـن حــبـنا حـكم اعــتدال
أنا مـا صــدقـت تـرضـى يـا زعـــول
كـنت مـخــنوق وتـنـفـســـتك وصــال
بعـــد مـا رديت روحــي بـالـقـــــبول
مـسـتحــيـل ارجـــع لأيــام الـضـــلال
لـو جـــهـلت بـرد لا تـرد بجـــهــول
جـــرح أنا ســـبته لا يـزيـد اعـــتلال
مـن آلام الـجــرح غــيرت الـمـــيـول
حـتى صـال الحــزن في قـلبك وجـال
لحـــظـة الحــرمــان دقـيت الطــبـول
وزدت ذاك الجــرح بجــروح القــتال
لـيه بس اخـترت اصــعـب هالحــلول
حـــل مـا يتــرك لـرجـــعــتنا مجـــال
المـشــكلة تـكــبر وخــايف ما تـزول
دام أنـا مـقــــدر اقـــــاوم احـــــتـلال
واقـف(ن) قـلبي ولا يـقـــدر يطـــول
حـــلـم كـان الأمــس بـايدينــه مــنال
من داخل اعماقي أنا اصـرخ واقـول
مــا ابـي افـقـــــدك لـو حـتى خـــيال



شــــعـر
نواف بن يوســف الســعـداني
يوم الأربعــــاء      14/08/1433هـ  ///  05/07/2012م

الاثنين، 25 يونيو، 2012

هذا أنا جمعت لك ديوان عمري في كتاب ...

(( ديوان عـمـري ))
                           
هـذا أنا جــمـعـت لك ديـوان عــمــري في كـتاب                 
منذ شــرقت شـمـسي وليد إلـين مـوتي بالغــروب
ما هي قـصيدة حزن ولا كلمات في لحظة عتاب
لكــنهـا رحـــلة أســى داخـــل دهـــالـيز القــلـوب
وجيت أنا صـرخة وليد احـســب لي الدنيـا رحـاب
ولا دريت إني اســـم على الحــياة أنا امـحـســـوب
ومن عـرفـتني وأنا طـفل(ن) من الآهــات شــاب
لين انكســر عوده وهو مثل الشجـر واقـف نصوب
قـزرت هالعـمـر بشـــقا منهـوش أنا من كل ناب
ويا كثرها أنياب(ن) علي اتحدتني لأقصى الدروب
واللي نهش عظمي أنا ناب(ن) بفك أهـل وقـراب
حـســافه عـروني وأنا لبـســـتهـم مـلـبـوس ثـوب
حــزمتهم خـصـري وهـم ياما طــعـنوني بالجـناب
والهــم تناولـني بعــد من كـل صـوب وكل صـوب
اقرب عضـيد(ن) للأسف بايعـني ابرخـص التراب
بايعـــني للـي انثـروا قــدري مـع عــج الهـــبوب
وخفت أنا حتى غديت امشي وسـط عـتم الضباب
ضيعـت احسـبني طـليق ايدين والقاني امقضـوب
ماعـمـري اخــترت الدروب ولا بعـــد فـكـيت بـاب
قادوني لدروب الهـلاك امغـمغـم العــين امغـصـوب
لو جـابهـوني بشــينهم ماخـفـت من قـص الرقـاب
لكنهــم بي اغــــدروا وأنـا على أمـــري امـغــلوب
مبيـوع أنا في بيعـة(ن) بيعـة بدون أدنى حـســاب
لكـن على النيـه أنـا ســــمـيتها حــــكم امـكــتـوب
رحـمـت حالي وعـشـت عـمر اداري هم الاغتراب
نـوب(ن) أنا اجـهـش بكا واضحـك بوجـه الدنيـا نوب
شــكـيت هـمي لخــالقي إلـين جـــرح الهـم طـــاب
وطــاب لي بنيـان بيـت من الصــبر بانيـه طـــوب
رغـم إنهـم ياما قـسـوا ودي لهـم  لين الحـسـاب
كنت ألتمـس عـذر(ن) لهـم رجـا لغـفـران الذنـوب
قلبي يســامحهـم ولـو يـعــيـش حــالة اضــطـراب
بالراحه افــديهم واظــل اســتر لهـم أكـبر عــيوب
لكـن بقـلبي هالقـهـــر اتجــاوز احــدود العـــتاب
على اللي اعـطــيته عـمـر وبالآخـر طــلع كـذوب
خـسـران كل عـمـري ولو فـــايز أنا برحـلة أيـاب
طـلعـت خـسارات العـمر أكبر من حـساب الذنوب
هو ذاق شهـدي وارتوى ثم اعـتبرني من سـراب
وأنا اللي في رغبة رضى كنت احترق شمعة وأذوب
وذاب عـمـري وهـو مـا عـمـره تعـذب من غـياب
ولا درى إن الزهــر مـيّت على وجهـي شـحــوب
وش بيني وبينك بعـد تسـقيني خـوف(ن) وارتياب
لين ارتوى ياسي هموم(ن) من مطر غيم الهروب
وصرت أنا صيد(ن) سهل تنهـشـني أنياب الذياب
وأنا اللي لي قلب(ن) نقي ولاني ابشخص(ن) لعـوب
خـليتني محـتاج حــب اشـحــده لــو مـن كـل بـاب
احـسـن عليه بالـوفــا وأنـا اللي اســـتغـفـر وأتـوب
يارب أنا مـظــلوم حــيل ودعــوتي  ابتســـتجــاب
لكـن دعــيتك اســقـني عـذب المـسـامح كوب كوب
يا عـلني اروى ارتيـاح من بعــد ظــمـي العــذاب
والنور يشـرق بالعـيون اللي زمن عـنها امحجــوب


شــــعــر
نواف بن يوســف الســعـداني

يوم الإثنــين      26 / 05 / 1431هـ  ///  11/ 05 / 2010م

كيف اوصـلك يا زين و أنت مشـاوير ...


(( غـيمـة غــيابك ))

كيف اوصـلك يا زين و أنت مشـاوير
و كل المشـاعـر فـيك مخــفـي أثـرها
لا بيـننا مـرســول يبـعــث تـقـــــارير
و لا لنـا جــــنة و نســقـي شـجــرها
ما غــير عـينٍ تقـطــر الدمـع تقـطــير
و شـيب روحي زاد و أبدى ضـررها
و غـصـون قلبٍ مـن غـلاتك مزاهـير
تعـال شـف وش صار بأحـلى زهـرها
من بعـد ما غـابت شـموس التـعـابـير
و الغــيم غــيب عـني حـتى خـــبـرها
غـيمة غيابك عـندي هـم و مـعـاسـير
و يا عـسـر غـيمـة ما تهـل بمـطـرها
يا بعد وجهك عن عـيوني المسـاهـير
و يا قـرب روحـك عـند قلب غـمـرها
حـتى عــيون القلـب صـارت نواظـير
و العـين عـن غــيرك تردى نظــرها
و النـظــره اللـي حــيرتنـي تفـاســير
دوم زرعـت شـوق و لا انبت ثمــرها
حـنا اجـتـمـعـنا صـدفة دون تـقــــدير
لحـظـة و ليـت العـمـر يحـيي قــدرها
خـل الزمـان يعــــيد بعـض المـقــادير
قلـبي يحـــرر لك مشــاعـر اســــرها
باقول ( أحبك ) و ألغي كل المحــاذير
و من ذاق لوعة نفسي و الله عذرها

شــــعــر
نواف بن يوسـف الســعـداني


يوم الإثنــين       24 / 02 / 1431هـ  ///  08/ 02 / 2010م

الخميس، 21 يونيو، 2012

ارجــع بعـــد كل الجـــفـا واصـــونها


(( نفـس الرسـايل ))

نفس الرسايل ما حكت شي(ن) جديد
ونفس الأماني اللي الظروف تخونها
تكـذب عـليه بـس أنـا قـلـبي عـــنـيـد
ارجــع بعـــد كل الجـــفـا واصـــونها
نفــسـي ولـو مـــره أذوّب هالجـــلـيد
واقـتل برود(ن) ساكن(ن) في كونها
حـتى ولـو تـوقـف تنـاظـر من بعـــيد
يجـرحني سـهم(ن) صـوبته عـيونها
ودي أنـا اركــض واحــضــنها اكــيد
عـشـان اداوي كل جـروح اطـعـونها
الصــدق أنـا ودي ولكـن وش يفـــيد
دام الرســايل ما تـفـي بمـضــمـونها
خــايف(ن) كل الـوفـا يـقــلب جحــيد
حـتى الوعـود اللي انحكت ينسـونها

شــــعـر
نواف بن يوســف الســعـداني
يوم الثـــلاثــاء    29/07/1433هـ  ///  19/06/2012م

ما كل عـشـق(ن) يا الغــلا فـيه ويلات


(( لا تبـدي الدمــعـة ))

ما كل عـشـق(ن) يا الغــلا فـيه ويلات
احـــذر تـوقـا وإنت تمــشـي على الدرب
دربـي أنـا درب الهـــنا والـمــســــرات
لكـن عــمــى عـــينـك ولا لــي أنــا ذنب
لـو النتيـجـة فـي تـجـــاربك غـلـطـــات
حـــرام تـظــلم كـل صـــادق بهـالـحــــب
جــيـتك أنـا كـلي فـــرح وابتـســــامـات
جـيتك بحـب(ن) صـار لك رحـمه وطـب
لا تبـدّي الدمــعـة عـلى حــلـو الأوقـات
خذني شذى عـطـور(ن) وريّح بها قلب
إنسـى زمـان(ن) كـان لك فـيه عــثرات
واضوي عـتم روحك بحـب(ن) لها شب

شــــعـر
نواف بن يوســف الســعـداني
يوم الســــبت   12/07/1433هـ  ///  02/06/2012م